炎明熹的啟示
炎明熹盛傳唔同大台續約，真假冇人知，但若果係真，我會有啲同情公司，因為咁係對創新及冒險嘅一種「懲罰」。先講下藝人作為一盤生意嘅主要持份者嘅投資與風險。
第一：藝人
付出努力提升技藝，放棄私生活，最大風險係紅唔起，浪費時間。
第二：經理人公司
投資錢、人力資源同時間，風險都係捧唔紅藝人，不過即使紅到，除咗極少數藝人之外，一般頭兩三年都一定係投資大過收入。一個5年約嘅藝人，經理人公司係要用最尾一兩年(假設藝人紅到)利潤，去補返頭3年嘅投資。所以除非簽10年以上，否則唔好話賺錢，回到本都真係少數。
第三：經理人
經理人先係藝人成日對住嗰個，感情亦一定深過對公司，所以好多藝人唔同公司續約，會同經理人一齊出去另起爐灶。不過經理人一直都係受薪，即使藝人紅唔起，最多蝕咗努力；紅得起就算唔同公司續約都仲有運行。
第四：幕後工作人員
曲詞編監梳化服都係屬於呢個組別，比經理人更立於不敗之地。佢哋由始至終都係收錢做野，唔紅冇蝕，紅咗叫價再高啲。我認識好多幕後，同藝人關係都非常好，我諗因為大部分時間係講點樣整得你靚啲，首歌點樣好聽啲，表面冇咩利益瓜葛。事實點會係咁？呢幾年幾多幕後會開演唱會賣飛，但叫藝人免費表演就知。
分析以上關係結構，大家就睇到成本風險基本上都係經理人公司一力承擔，輸多贏少。而解決方法就係張約簽長啲，但咁又會令藝人唔想簽；而到續約期將至，自然會有班人喺背後同藝人講經理人公司的不是，令佢哋唔想續約。
縱觀亞洲區嘅藝人，呢個狀況屢見不鮮，結果只會令經理人公司投資愈嚟愈謹慎，合約愈嚟愈苛刻，令藝人更卻步，其他利益集團繼續煽風點火，惡性循環。若果炎明熹真係唔續約，我有啲戥大台唔抵，因為咁反映出一個結構性現象：就算經理人公司幾願意培養新人，現實，只會令公司愈嚟愈灰心，亦都解釋到，點解我哋呢個市場，咁難有下一個天后。