上周Netflix忽然將評價不錯的《sense8》腰斬了，第一時間當然是㷫到火燒，我比較無血性，雖然好嬲也沒有像某些外國網友馬上取消account，因為在煲剛回來第五季的《House of Cards》，連同較早前《情陷紅磨坊》導演套燒錢的《The Get Down》、一早話第三季會完結的《Bloodline》，Netflix連斬數劇，手起刀落，好像好無情，其實都是錢作怪。
撰文：Carman Chan
小眾題材
第二季《sense8》一集製作費原來已去到9百萬美元，《Game of Thrones》拍到第六季，才上到一千萬美元一集，但《sense8》內容涵蓋咁多爭議性，雖然有科幻、陰謀理論包裝下講大愛打破隔閡，但其LGBT取向太強烈，不少性愛場面拍得大膽，有網友評價係實在太多元包容喎，一般觀眾未必頂得順。如果講入屋，梗係唔夠《House of Cards》、《The Crown》等，但如果製作規模細啲，燒少啲錢，圍埋間屋幾個場景就搞掂的話，小眾題材要拍幾耐都得，《Orange is the New Black》夠講女囚啦，仲有個個係喱士邊，又唔見佢斬？當然OITNB評價又高些少嘅。
緊扣初心
係戥《sense8》唔抵，雖然套劇沙石唔少，有時編劇Wachowskis兩姊妹(兩位雙雙變性了)拍得「性」起收唔住掣，但二人初心卻每集都緊扣，人與人之間，無論是因種族/信仰/性別/性向的不同，所產生的隔閡及仇恨，就算幾深幾難化解，只要有愛，都有希望可以走番埋一齊。
我記得自己年頭仲話，希望這種多元及包容精神，在現今世情嚴峻，更加需要大家堅守同捍衛，現實世界恐怖主義活動頻仍、美國又開倒車，如今連一套電視劇都守唔住，最終都死在S加兩棟這個字上，都幾心灰。網上有聯署活動請求Netflix再三考慮重新pick up，類似《The Leftovers》(網民呼聲終於給HBO採納)的奇蹟，能否再次出現？