陳卓賢的吐氣揚眉
MIRROR嘅陳卓賢(Ian)7月首個個人演唱會門票火速售罄，公司Makerville亦順應民意宣布加場，仲要加兩場到5場，成為場次最多嘅鏡仔，之前Jer、姜濤同Anson Lo都係開4場。
其實Ian開記者會時，已經話希望開至少5場，當然佢夠受歡迎先開到咁多場，但我亦肯定公司要做呢個決定唔容易，大家都知公司做咩都好易被fans話大細超。今次都肯定會有好多Hellosss以外嘅fans不滿，咁點解公司都俾Ian如願以償？
Ian係首批出solo嘅鏡仔，但多年來Hellosss都怨公司偏心其他人，冇落力捧。他今日吐氣揚眉，等我同大家回顧下幾段歷史：
1. 幾年前，外面傳Ian脾氣差被公司雪藏，魯生喺IG度叫Ian同花姐做「雪櫃冷笑話」，輕鬆高招地瓦解謠言。
2. 魯生(又係佢)有次喺IG講認識Ian嘅故事，但只寫咗三個字：後樓梯。Ian回覆話「你唔好整喊我」。即使唔知後樓梯代表咩，都會感受到呢個咁有溫度嘅互動，背後唔只係商業關係，而係有感情嘅鼓勵。
我估係同Ian入行嘅一波三折有關，Ian參加《造星》前，已經簽咗另一間經理人公司，行內傳聞，張約幾乎係賣身契，令Ian好煩惱，喺MIRROR嘅身份亦好尷尬。但冇幾耐就聽到佢正式加盟ViuTV/Makerville，行內都知得一個可能——巨額贖身，亦幾肯定唔會由當時剛出道嘅Ian俾啦。老實講當時《造星》大把人揀，MIRROR唔使12個人亦得，相信公司睇到Ian長遠潛力，先會用盡方法幫佢贖身。
3. Ian初出道時，曾捲入一連串緋聞，林海峰都喺《叱咤》當眾笑過佢同好多女神都好熟。通常呢啲人就會不停被影到同唔同嘅女仔一齊，再被冠以「溝女王」之名，就咁摧毁一個偶像嘅前途。但Ian不但完整無缺，相都冇張，仲建立到乖仔形象。點解呢？
一個歌手嘅成敗，公司俾幾多資源捧佢只係其中一部分，更重要或者係公司喺歌手有難關時點撐佢。公司對Ian究竟係忽視定重視，交俾大家判斷。俾多個參考大家，鏡仔solo嘅發布會，魯生只去咗Ian嗰個。