來到5月中，當《BIOHAZARD Village》都賣街之後，坦白講家用機平台又開始冇乜心水作品想分享；手機方面大打廣告嘅近期有《侍魂：朧月傳說》，但如同好多國產手機MMO一樣，呢隻又係買IP嘅換皮作，如果冇《侍魂》包裝真係非常一般，土下座亦覺得喺手機玩MMO唔太適合。就偏偏喺呢個時候，大家熟悉嘅Kairosoft又推出新作《創意漢堡物語》。唔記得之前有冇介紹過Kairosoft嘅遊戲，由2008年開始喺手機平台推出《遊戲發展國++》之後，不知不覺玩佢哋嘅作品已經十幾年！Kairosoft每隻遊戲都有相當出色嘅遊戲性同毒性，令佢哋地位仍然屹立不倒，就算冇玩過都實見過朋友玩。今次《創意漢堡物語》主題係漢堡包，加上更為複雜嘅操作同系統，已經超出咗策略手遊嘅深度。首先除咗要開發新漢堡之外，仲要同時營運最多10間分店，另外尋找新食材、同食材供應商打好關係、訓練員工及店長、店內布局、廣告主題等，全部都需要玩家操作！可以話係至今玩過最多嘢做嘅Kairosoft出品。假如大家搵緊啲唔使課金又耐玩嘅手機Game，呢款值得推薦！