上個月PS4大作《The Last of Us Part 2》爭議一直未停，講真土下座都好厭，因為遊戲係神作定糞作雖然好主觀，不過評論遊戲其實背後有一定邏輯同標準，由情緒主導嘅Game評真係無需太在意。而緊接另一隻焦點嘅，就係即將17日推出嘅《對馬戰鬼》。土下座已率先試玩過，雖然未爆機但都有少少心得分享。呢隻Game注目在於當年E3發表時嘅風格，日本武士加上黑澤明嘅電影風格，畫面嘅光影對比非常強烈，隨風飄揚嘅花草充滿整個畫面，似係款賣畫面嘅作品。到實際上手玩，遊戲畫面雖然跟宣傳片有一定出入，但未至於貨不對辦咁嚴重。你依然會睇到只此一家嘅武士電影風，並非《The Last of Us Part 2》嗰類大量高清貼圖同恐怖嘅細節，而係專注喺整體畫面嘅美術觀感同氣氛，雖然近睇貼圖都係一樣粗糙低清，但完全唔影響畫面表現，而且遊戲非常特別，畫面稱得上完全冇UI，連小地圖同導航都欠奉，取而代之係用畫面上嘅物件去帶領你到目的地，例如風嘅流向、突然出現嘅雀仔同狐狸等，你跟住佢地行就自然到達，唯一有UI嘅地方就喺戰鬥嗰陣。戰鬥系統其實都相當有特色，不過篇幅所限都要收筆，趁疫情又再爆發，悶悶地冇嘢做，呢隻遊戲絕對值得一買。