除咗「三國」之外，以金庸小說為主嘅武俠題材手遊，絕對係另一個不死題材，有版權嘅多，冇版權嘅更多到數之不盡。上年有《新笑傲江湖手機版》洗版式廣告，今年年頭就輪到《新射鵰群俠傳之鐵血丹心》。唔計中國，單係港澳台首發，呢隻遊戲已經係免費下載第一名，搞到開發公司因此股價大漲9%而一度成財經新聞，算係近日除咗《三國志戰略版》外最爆嘅手遊。遊戲本身都係抽角色、砌隊、推戰力打排行、入幫會打佔地戰等，而養成角色嘅方法同埋副本嘅設計，全部都可以話毫無新意。不過遊戲就攞正牌，有齊《射鵰英雄傳》、《神鵰俠侶》同《倚天屠龍記》嘅版權，有齊三部曲嘅角色，劇本就係以玩家做視點，去經歷返小說劇情。老實講，fans淨係實現張無忌大戰楊過、王重陽單挑林朝英等場面已超爽，不過客觀睇遊戲就真係一般，特別係劇情只係去到原著歸雲莊就完，後續完全冇文字交代，而角色育成、戰鬥系統及美術等，都完全唔合乎近年標準。不過相信只要打住「金庸」旗號，呢隻game都仍然會大熱一排。