9月1日要返工。雖然知道當日有「機場交通壓力測試」，但都無特別提早出門口，直到新聞話陸續有地鐵封站，無辦法只好碰下運氣。
順利到達東涌，原來已經係尾班車，現場不少示威者及遊客。正當我行出站口，有個外籍遊客好似哮喘咁喊住跑過來，話好驚唞唔到氣。喺機艙做咁耐都未遇過呢種情況，估唔到會喺地面幫手。有示威者見到就走來同我一齊幫佢穩定情緒。我勸不如住多晚先走，因為唔知之後會發生咩事，而當刻警察又衝緊出來……講完諗住搵路走，點知有人大叫「佢著制服唔會有事！大家跟住佢！」大佬呀，宜家出街買菜都俾人拉，我著到成個靶咁，肯定無事啦！話口未完，聽到一陣響聲，地鐵站內的人叫住1、2、1、2(保持步伐穩定，避免人踩人)咁衝出來，據說有警察在驅散，我們都各自散開逃命。
打俾公司得知有個crew bus站，但都要走一段路。如今後無退門唯有頂硬上。我拎住個喼上上落落，有跑緊的示威者竟然返轉頭幫我抬，仲叫我小心。當時真的愧疚到差點喊出來，轉頭我就有車坐，但佢地就冒生命危險東躲西竄……
去機場途中見到新聞話白衫人出來砍人，心裡只好默默禱告唔好有人受傷。飛機抵達目的地已是凌晨，見報道當晚逾5,000架私家車接載被困機場的人離開，被稱為「港版鄧寇克大撤退」，是夜馬路星光燦爛。
大家口口聲聲的「暴徒」真係咁得人驚？還是無差別「揮動警棍」的人更令人恐懼？親自落場睇一睇，可以釋去好多疑慮。