今年有隻手遊令土下座同好多人都覺得非常意外，就係app store一直有排名嘅《弓箭傳說》，雖然佢簡單，但遊戲性就好足，玩一玩都好易「中毒」，當時都有同大家分享過。
而最近一隻叫《直到我中了一箭》嘅國產手遊就更令人意外，因為一睇畫面就覺得同《弓》好相似，玩落就更明白呢隻係完完全全抄襲之作，相似程度高到直情話偷咗《弓》嘅原始碼我都信！
土下座查過資料，其實《直》呢隻手遊，最初係叫《暴走大俠》並早響大陸推出，結果好快就俾「原裝」嘅《弓》投訴至下架，但估唔到改一改名又嚟過，而且甫推出就上到收費排名，足足都有兩星期，今次似乎又冇事啦！
其實唔講Android都「冇王管」，土下座一直都唔係幾明白蘋果App Store機制，因為除咗《直》，好多擺明冇授權嘅遊戲，用咗《龍珠》、《三國志》等IP，都一樣留到榜並且可以不斷收錢甚至賣廣告，反而早排一個提供飲食情報嘅app就要一再審查，到底準則係點嘅呢？