一直被好多人視為「正宗」MOBA遊戲嘅《英雄聯盟》手遊版《League of Legends: Wild Rift(英雄聯盟：激鬥峽谷)》，大家等咗好耐，Riot Games近月都有限度地發放咗測試版本，唔少直播主都有玩過。點計都會今年內推出，至於日期呢……估唔到喺iPhone 12發布會上似乎露出玄機，皆因今年幫iPhone 12「站台」嘅手機遊戲，正是《英雄聯盟：激鬥峽谷》！Apple為咗強調新手機嘅性能，用呢隻有機會係全球期待度最高嘅遊戲做示範，雖然冇強調畫面同性能，但相信iPhone 12理所當然係支援最高解像度同60fps，並同時強調手機版表現會非常相似PC版，絕對值得大家期待。既然配合iPhone 12宣傳，上架日期自然唔會同手機推出日相差太遠啦！土下座覺得，而家手機愈來愈強調遊戲部分，手機嘅運算速度比唔少Notebook都更快，而手機遊戲嘅精緻度亦愈來愈高，假如日後真係做到Switch咁樣，外插個底座將畫面Output去電視打機，都唔算好難想像呢。