超級品牌的創作總監又大執位，基本上經已無乜感覺，早一輪的音樂椅坐定定，交出來的成績單，有哪個令人留下深刻印象？Sorry，係無，醜到極點就有，好似話要將Lanvin打造成法國版乜乜乜那位仁兄，連名都唔使提，因為經已下堂求去，家陣成個牌子都生死未卜，好多時裝人已經將牌子暫時除名，好似股票停牌一樣，out of sight，out of mind。
撰文：Carman Chan
交唔到數躝屍圪路
呢期大執位人物名單就大名好多，Hedi Slimane去Céline、Riccardo Tisci去Burberry、Kim Jones去Dior Homme，我班同事就鬼哭神嚎，話要趁Phoebe Philo最後兩季(18秋冬最後)盡地一煲買得幾多得幾多，Hedi去到Céline就會將品牌反轉再反轉，就像他上次搞到YSL個Y都無咗咁慘烈。
其實這些執位活動，若果你不是某某忠粉，不過是商業運作，邊個去邊度都係當睇戲咁睇，我以前都有一度相當迷戀Riccardo Tisci，季季Givenchy都有幾件係可望不可即恨要到入骨，搞搞吓愈來愈gimmicky，靠小鹿班比同洛威拿圖案汲水汲到而家，吸金能力與創意成反比；品牌找人也只看star power，到底人跟牌子夾唔夾已無關宏旨，品牌legacy有等於無，好聽點說就係有新鮮感，唔好聽就是將牌子的heritage拋諸腦後，最緊要有數番，設計師不能「show me the money」，換人就換人無情講。
靠黐人金糠可留低
Talented如Phoebe都係咁話，其他較次的更不在話下，有冇人為Kris Van Assche給LVMH掃地出門而可惜？反而Kim Jones由LV過檔Dior Homme呢單就相當好笑，都係LVMH旗下牌子，成件事好似老闆睇下屬唔順眼要他轉部門，甚麼傳言他日後接掌女裝鋪路，一統Dior天下，煞有介事似的，聽住先啦。除了牌子logo，人還是那個人，老實說，Kim Jones除了找其他潮牌聯乘很在行，多年來叫人印象深刻的東西，一時間真係噏唔出，如果他的aesthetics是貫徹的話，到時Dior Homme咪同而家LV男裝一樣樣？難怪要靠聯乘來保名氣。最近他趁換位的空檔幫GU做了一個系列，感覺只有四個字：平平無奇，這樣也可以「轉部門」而不是「給約滿」要另謀高就，我有少少戥KVA唔抵：二人交的卷一樣咁白，一個有得留低，另一個就you’re fired，餘下滿腦子黑人問號。不單只時裝，連時裝界嘅嘢，我都真係只能說：識條鐵了。