今屆世界盃下月中於俄羅斯開鑼，觀塘apm商場舉辦「全城瞓身睇足球」通宵睇波活動，繼續愈夜愈精采，全程直播64場賽事，商場中庭更會搭建一個6千呎有克里姆林宮特色嘅場館。新地(中國)執行董事馮秀炎話俾Ray知，屆時除咗中庭部大電視，仲會再加多部460吋高清巨型大電視，同埋3千呎人造草地加強臨場感！
怕去到先知無位坐？商場新增「預訂」方式，可用App或到apm個網站登記留位，將收到短訊編碼，不單可獲快證，更獲贈具俄羅斯元素嘅禮物包；除預訂快證外，即興嘅球迷到場，馮秀炎話，中庭設600至800個座位，兩層加埋約有1,500個座位。根據以往經驗，滿咗嘅話，其他市民亦可在企位睇波。
除咗睇波外，場館安排相關展覽，包括展出穿着多國足球衫嘅俄羅斯娃娃、球王比利簽名波衫等近百件足球相關的收藏品，同場更設食買玩嘅狂熱市集等等，亦豪送300萬元消費獎賞及大抽獎，有機會贏取五座位豪華房車、 五星級酒店住宿及潮流鑽飾等。