最近同老公好沉迷一套名叫《First date》嘅真人show，睇到欲罷不能。製作單位會根據班單身男女嘅喜好、擇偶條件等等，係芸芸參加者中安排對象俾佢哋單獨食餐飯。個節目除咗會影佢哋食飯嘅情況，係每一集嘅尾聲仲會講埋佢哋幾個月嚟嘅近況，二人是離是合還是再次成為陌路人。
有一集令人印象好深刻；有個女仔自言不是標準美女，從來未拍過拖，佢性格本身好被動，喜好嘅事物亦比較偏門，例如男方問佢最鍾意嘅電視節目係咩，一般人或者會答某劇集，而個女仔嘅答案卻係天氣報告。男方係一個好似泰山咁嘅長髮運動佬，個性陽光主動，行出街回頭率應該極高。上電視之前好似唔知係邊度旅行完返嚟，係一個不折不扣嘅標準猛男。
二人性格可謂南轅北轍，我諗呢個組合好多人都未必睇好。佢哋一見面都真係好尷尬，女仔就頭耷耷望住自己杯嘢飲，唔係好望人，男方亦顯得有點不知所措，淨係識企喺度傻笑。不過過咗一排之後佢哋就愈傾愈順，男仔嘅主動同女仔嘅被動配合得天衣無縫。言談之間佢哋發現大家家庭背景原來好類似，二人仲鍾意埋同一套卡通㖭。雖然性格同形象唔同，但原來好多嘢都好夾。最後片尾仲話佢哋幾個月後同居埋，而家計劃緊婚禮，二人一狗生活得好開心。
又有另外一對，男嘅高大威猛，女嘅沉魚落雁。男嘅做攝影，女嘅做model，大家都鍾意靚嘅事物。佢哋見到面嗰刻好似好夾㗎，第一次見面就已經摟肩搭背。不過佢哋傾落就反而似互相較勁多啲，最後二人掛住僵硬嘅笑容話「梗係會想再見面」，但片尾交代佢哋喺節目完咗之後已經冇再聯絡，再也不相往來。
或者我同我老公咁鍾意呢個節目係因為佢令我哋諗起同對方剛相識自己。係囉，唔好俾所謂擇偶條件限死自己，一個人如果唔識欣賞你，佢身高六呎、家財萬貫，才華再洋溢都冇用。相反，無論其他人點睇你，覺得你嘅條件同社會標準相差幾遠都好，只要你肯相信自己同對其他人坦白，總有一日你會遇到識欣賞你嘅人，所有嘅怪係佢嘅眼中都會變成優點。「若你喜歡怪人，其實我很美。」