呢排電腦保安事故廣受關注，自從爆出WannaCry病毒後，Ray就頻頻收到朋友的message，唔單止教路如何預防中招，亦有好多不同種類的網址，提醒大家千祈唔好登入。不過，假網站喺虛擬世界係燒不盡嘅野草，Ray日前亦收到個偽冒HKT的電郵，希望大家小心留意。
封電郵係話Ray的信用卡有問題過唔到數，所以要求用戶登入所提供的網址更新資料。雖然個電郵嘅仿真度都幾高，除了有HKT的logo外，亦用埋佢哋個名嚟寄出郵件，但Ray明知佢係假，用嚟騙取網民資料嘅，都出於個人好奇，click去個網睇下有幾似樣。結果發現，個網站設計同原裝正版有幾分似，一個唔留神，真係幾容易中招㗎。
不過，又無話分辨唔到嘅，就係喺輸入網址個欄位，會標示「不安全」嘅提示，同埋個網址水蛇春咁長，連HKT三個字都無，仲唔係假！至於真網站係有「安全」字樣之外，網址係https://www.hkt.com，大家應該唔會搞錯。
Ray之後仲未罷休㗎，喺Login ID及Password求其打啲假資料，結果又登入到喎，喺個人及信用卡資料啲格仔度，又亂咁填啲數字落去，確認之後，竟然彈返去真正嘅HKT用戶頁面。嘩！有乜辦法唔呃到人先，所以Ray立即通知HKT跟進。HKT都好快回覆，講明從不以電郵要求客戶提供個人資料，市民如收到，不應理會，並應立即刪除。