MDRT
保險業有個組織叫「MDRT(Million Dollar Round Table）」，中文就是「百萬圓桌」。組織的源由，追溯到當初1927年，他們首次會議，當時出席的壽險業人士，業績收入都超過100萬美元，因而得名。今時今日全球有會員，在香港要加入做MDRT會員，年度收入最少要大約77萬港幣，而2023年香港區有六千幾人達標加入MDRT。
大家上Social Media，身邊總有些MDRT，他們每年身光頸靚出席保險活動，只是想告訴大家「我今年搵好多，好威」。保險業人士有時惹人反感，就是因為他們好喜歡戴住隻撈，把手擺在歐洲車軚盤上影相放上網晒命。當他們自以為「好惹人羨慕」，其實我每次睇見都想話「原來我每年交咁多保險費，唔係用嚟保障自己，而係幫佢哋買錶買車買樓」。
不要仇富。資本主義嘛，人家又不是做善事，給了你適當保障，自然要有報酬。即使醫生有仁心，也從來只會加價，無論經濟周期，香港興衰，我沒有聽說過醫生會減價跟大家同舟共濟。如果有醫生這樣做，我怕同行會勸他也幫襯一下精神科。所以一切和對錯無關，有供有求，有人幫襯就有市場。
要討論的其實是公關PR。他們穿金戴撈晒命，就預有人反感，有人會不喜歡「部分」保險人的拜金嘴臉，質疑他們收取了暴利，而不是適當比例的服務費。假如我是保險公司高層，我就會嚴禁同事在社交媒體上賣弄「今年又賺幾多幾多」，而是「今年幫幾多位客戶claim到幾多保險」；另外搞一個本地版的「MDRT」，宣揚日本的「冇得R Tips」精神，服務係幾多就幾多，明碼實價唔會收凸；又或者「冇得R頭」，宣揚買保險的客戶都「清楚明白」，不會買得不明不白。比起天天告訴我他又買了名車的保險人，我覺得能夠幫客戶claim得返部車，似乎重要得多。