最近PlayStation宣布已經正式推出25年，土下座真係唔認老唔得！唔知讀者有幾多個係好似我咁睇住PS面世呢？想當年遊戲界由盒帶、2D時代，一下子變成由CD及3D主導，首隻3D格鬥遊戲《鬪神傳》、首隻3D嘅JRPG《Final Fantasy VII》等，都意味住2D遊戲時代已經過去，而且當年嘅PS每月遊戲數量都非常恐怖，可以話係不輸超任嘅黃金時代。另一方面，一直處於不敗位置嘅遊戲龍頭任天堂，俾Sony呢個業界初哥反將一軍，多次商場上嘅對決都無法佔優，甚至去到一蹶不振嘅地步，直到而家都再冇勇氣同Sony正面對抗。每代遊戲主機大戰背後嘅利害關係，更直接影響埋科技發展，例如DVD同BR等媒介嘅普及其實都同遊戲機有好大關係。以上一切都係由25年前PS面世開始，仲未提及嘅仲有翻版及改機文化，真係一匹布咁長。下年年尾後繼機PS5就會面世，照睇PS將會陪伴唔少人度過餘生。