一講到做善事，香港人出錢出力，加埋跑步，肯定更刺激大家捧場兼大解慳囊。由聯合國兒童基金香港委員會(UNICEF HK)舉辦的第12屆聯合國兒童基金會慈善跑，吸引多達超過1.25萬名跑手參加，認真熱鬧，有望為該組織籌得高達1,100萬元善款，支持全球抗愛滋運動。
近年做咗跑步KOL嘅恒生銀行傳訊及企業可持續發展總監 張樹槐 (水哥)當然義不容辭，Ray知道，這位參加半馬賽事嘅商界公關「一哥」籌款能力絕對不弱，籌得的款項在最高個人籌款獎中勇奪亞軍殊榮。
UNICEF HK榮譽顧問唐英年噚日仲搵埋行政會議召集人陳智思齊齊喺舉行地點香港迪士尼樂園度假區主持領袖挑戰賽揭幕儀式，加上見到善款咁理想，飲得杯落！
此外，罕有棄車用腳的「牛下女車神」李慧詩參加3公里領袖挑戰賽，更以14分30秒時間奪得女子組冠軍。另一車神黃金寶亦帶埋兩歲囝囝參加3公里親子賽，兼且仲有今年新增嘅「星球大戰5公里賽」，連星戰迷都要嚟捧場。