年輕時，有位以戀愛顧問自居嘅朋友，有一日唔知受咗咩啟發，突然語帶輕藐咁指住我話：「如果話男人係天生嘅賽車手，女人就係各式各樣嘅賽道。男人向來都喜歡征服果啲九曲十三彎嘅山路。而你？你係一條平坦而沉悶嘅直路咋！毫無挑戰性！」
自始我每次就算遇到心儀對象，都會刻意令自己好難搞，務求令人唔知我諗乜。我學會語帶輕挑、時不時搞失蹤、陰晴不定、講一套做一套，自以為好性感好難捉摸。
日子一日一日咁過，如果再要用山路嚟形容女性，用秋名山黎形容當時嘅我就最適合不過。但係神奇在我仍然遇唔到好男人，反而人渣就一大堆，拍拖拍到遍體鱗傷。
直到我遇到而家老公，係佢面前我無所遁形，扮都冇意思。慢慢我又不知不覺還原返成為當初嗰條「高速公路」。佢打從心底喜愛我嘅坦率，欣賞我嘅見義勇為，甚至接受埋住喺我內心深處嘅社交障礙乾物女。佢令我明白一個人如果夠愛自己，係唔會要我哋轉彎抹角。相反如果你一直需要班門弄斧只為留住一個人，咁佢好大機會只係愛你嘅伎倆，沉迷於追逐嘅快感，而唔係你本身。
事隔多年，我同嗰位激動嘅朋友都好耐冇聯絡喇。只係喺一次舊朋友聚會到聽到佢嘅近況，聽講佢至今依舊喺愛海浮沉，繼續喺感情路上你追我逐。
* 新書《願我七老八十還記得的事》，於香港各大書店有售。