香港同胞慶祝中華人民共和國成立68周年籌委會秘書長蔡冠深(右)。
每年國慶，煙花匯演及文藝晚會等都係「例牌節目」，對年輕一族來說，吸引力不大。主辦單位於是喺3年前開始舉辦「國慶青年音樂會」，針對年輕人，今年繼續舉行，亦邀請來自韓國、內地及香港三地歌手演出，包括韓國人氣組合INFINITE、Jun. K(2PM)、白娥娟、新晉內地組合Boy Story，以及本地歌手吳業坤和林欣彤等。
主辦單位、香港同胞慶祝中華人民共和國成立68周年籌委會秘書長蔡冠深同Ray講，音樂會符合年輕人口味，過往兩屆亦反應熱烈。為了切合國慶主題，所以必定邀請香港和內地歌星參與，其中本地歌手吳業坤更會打頭陣演出。佢又透露，第三度來港參與的韓國男子組合INFINITE，將由去年獻唱4首歌增至5首，希望令出席的年輕人能夠更盡興。
音樂會將於下月2日晚上8時在紅館舉行，雖然所有門票，喺月初開賣當日售罄，但一眾粉絲們毋須傷心，因為不少媒體都會喺音樂會後足本重播。有線電視娛樂台將於音樂會翌日，即係下月3日下午2時首先重播；而免費電視奇妙電視會於下月5日早上9時播放。