我著低胸衫唔係犯罪，你𥄫我都唔係犯罪，但係你𥄫我𥄫到流晒口水，仲對我出手就係犯罪。你話女人著低胸衫係引人犯罪，應該預咗。咁你犯罪都應該預咗受靶，我摑你一巴，預咗你預咗。
你話係公事叫我陪你去ball，我叫你搵個男同事同你去，你又多多藉口話唔好，仲話我去唔到就叫個妹去。你平日嘅人狼行為，大家都已經有戒心。俾個小紅帽你，佢仲有得剩。我出晒名又惡又mean，生人勿近，你竟然唔怕死搞我？
我摑你係幫你啲血谷番上腦，等你識得用番個腦去諗嘢。你用吓腦就知，你再扮friend、扮熱情、扮有西方禮儀係唔work。
一見面你唔係望我對眼，係望我心口，連hello都未講完就熊抱。你使唔使攬得我咁緊呀？乜而家我條腰喺個胸度咩？點解你隻手會攬到我個bra扣位置？喂，你做咩彈我條bra帶呀？你見唔到我個樣，仲兇過鬥牛㹴咩？你仲夠膽「控」塊面埋嚟要錫啖先？！我已經避你，你仲成餐飯詐帝同我傾秘密，借意喺我耳仔講嘢，吹氣埋嚟，仲喺枱底掃我大髀。我臨走喺停車場先摑你，唔係對你好，係唔令主人家掃興，呢啲社交禮儀，睇怕你呢種人狼唔會識。
你係我個大客又點？唔俾生意我又點？我一個星期做7日，一日做14個鐘，為咗做好份工，我可以唔食唔瞓，我今時今日嘅成績，係我努力捱番嚟嘅，乜你以為我會怕無生意會唔出聲咩？
話你知，5年前我遇到另一隻人狼，我都摑咗佢一巴，佢無再俾生意我，因為佢已經俾老細炒咗。