上個月同老公返咗香港探探家人、感受一下城市氣氛。喺旅程嘅最後一晚，我哋喺住嘅嘉里酒店度食晚市buffet為旅程作結。當晚buffet有各式冷熱菜式、壽司剌身、老火湯、即開生蠔等等，加少少錢仲有香檳任飲𠻹。算係喺呢段氣氛低迷嘅日子為自己打打氣，苦中一點甜。
講起食自助餐，其實我都有段古。話說我人生中打嘅第一份暑期工係喺某日式連鎖麵包店度做店員。當年主要貪人地套制服靚，同埋貪可以篤下收銀機咁。賺嘅人工唔多，而我當年將決定人生第一份糧請全家食buffet。
帶家人出去食飯對年紀輕輕嘅我嚟講絕對係大事，仲記得第一次主動帶屋企人出去食飯嗰種光宗耀祖嘅感覺。去到門口戰戰兢兢咁同待應生講低自己留咗咩名，然後坐底就瘋狂戰鬥。全餐飯都食得好開心，直到俾錢嗰陣先知原來餐飯要加一，自己又傻下傻下淨係帶咗未加一前啱啱好嘅現金。當時自己細個未有信用卡，最終都要麻煩父母俾錢。而最後父母都堅持唔肯收返我錢，所以到頭來自己都冇用到人生第一份糧請家人食飯。
話咁快就過咗咁多年，冇諗過貶下眼自己已經長大成人，坐喺餐枱對面嘅仲係自己老公𠻹。時間過得比想像中要快，下次返香港一定要帶父母嚟食返轉。再嚟嘅時候，我答應我會記得帶夠錢。