每次同朋友講起瑞典，大家都會聯想到肉丸(瑞典語：Köttbullar)。不過唔講唔知，瑞典肉丸初形嘅發源地原來並唔係瑞典，甚至唔係北歐，而係……土耳其！
相傳瑞典肉丸係喺十八世紀由瑞典國王Charles XII ，打完仗後由土耳其將食譜帶返嚟瑞典，再改良而成。市面上最常見嘅瑞典傳統肉丸配方，材料大致離不開豬肉、牛肉、麵包碎、洋蔥、牛奶、雞蛋等等。家家戶戶都有自己獨特嘅配方同做法，例如我先生家族嘅肉丸食譜仲會加入埋小量魚肉吊味𠻹。近年愈嚟愈多人選擇少食紅肉，市面亦上多咗一啲突破傳統嘅肉丸，例如純雞肉肉丸、素肉丸等等，好讓唔同飲食習慣嘅人都可以一嘗呢份瑞典美味。
食肉丸呢啲咁傳統嘅食物當然亦要配薯仔，因為瑞典人鍾意食薯仔嘅程度，不下於我哋香港人對飯嘅熱愛，總係唔食唔安樂。肉丸配薯蓉或者烚薯都係唔錯嘅選擇。除咗薯仔，當然唔少得越橘(瑞典語：Lingon)同醃青瓜片，甜甜酸酸咁，等你食多啲肉丸同薯仔都唔怕「漏」。
仲記得人生第一次接觸瑞典肉丸係因為嗰間街知巷聞嘅連鎖傢俬店。當時自己仲係個細路，覺得傢俬舖入面有餐廳呢件事簡直係史上最偉大嘅發明，為「陪大人行傢俬舖」呢件沉悶至極嘅事帶來一點點嘅樂趣。為咗鼓勵大家留在家中抗疫，最近傢俬店嘅英國官方公開埋肉丸嘅食譜，只要喺搜尋器度打「Swedish meatball + (店名)+ recipe」就會搵到，掛住佢哋肉丸而又唔想出街同人逼嘅讀者不妨試試！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter