如果一世人一定要搵一個角色做一次，我會揀做老師，春風化雨嗰啲。唔排除我馬後砲呃埋自己，不過想做老師依個諗法確實令我2008年的起心肝晨早流流山長水遠走去天水圍教填詞，然後2014年仲離譜到辭埋份工開籽識教育。
十年前踏入課室個畫面、當年準備咗嘅教材內容、同學嘅作品，我都記得一清二楚。印象深刻因為第一次。那班學生，個個精叻醒目，全部都好乖好聽話。星期六上堂，無人遲到恰眼瞓不特止，考試唔會考嘅填詞功課俾足心機做，無聊又老土叫佢哋改筆名又真係改。仲寫信送小禮物俾我，為師者得到咁嘅待遇，我算係幾生修道。
然後更幸運嘅事竟然係喺十週年後嘅今日發生：重遇當年嘅學生。十年無見已經畢業啱啱搵到份新工猶疑緊人生方向，喺工作場合同我相認，我覺得好奇妙。佢可能覺得好奇怪我會記得佢，仲雀躍到捉住佢影相留念，啱嘅，畢竟其他老師年復年咁對住無限個學生，唔係特別標青或者難搞又點會咁一見如故吖。我唔同喎，做老師唔係我嘅職業日常，教過嘅學生數都數得晒。係珍貴啲。
相約飯聚，互相分享這十年來做過的事，分享各自對人生不同階段的解讀，很夢幻很感動。我作為一個只上五堂，不管紀律不改功課落堂拍拍屁股走人的課外活動老師，竟能坐擁這種見證學生長大成人平起平坐的動人時刻，真幸運。
好喇寫完喇，無結論㗎其實我依篇文，純粹開心share。之但係如果硬要俾個總結，都係嗰句：如果一世人一定要搵一個角色做一次，而你又未有心水嘅話，我建議你做一次老師。