如果你屋企有工人姐姐，咁同其他有姐姐嘅朋友傾吓自各嘅僱傭關係就係一個走唔甩嘅口頭活動。
我個人唔特別鍾意傾啲「日常生活」嘢，所以覺得依個話題無咩重複又重複嘅討論價值，但每次朋友聚埋自自然然又講起，每次講起又自自然然咁面紅耳赤，我通常都係答返啲無靈魂嘅「都ok啦」、「不過不失啦」、「搞掂啲嘢咪得囉」盡量嘗試成為話題終結者。
其實講嚟講去，離不開都係點預防佢哋最擔心嘅事發生：虐待你個仔、傷害老人家、手腳唔乾淨、借埋大耳窿嘅極端事件。為咗杜絕以上一次，大家分享有咩可以做，然後各位建立一套獨門家傭條例。
就算無以上嘅事發生，每個群組都總有一兩個人幾個月又換一個姐姐，個個差到離晒譜，自己點點點唔計較點點點為對方著想，結果都係唔好彩次次信錯眼緣。我當然唔排除有人純粹唔好運或者眼光唔好，但我更加相信大部分情況，無聊對住咩人咩關係，都係你點對我我點對你。
有無將心比己明白人哋離鄉別井都會有情緒、有無體諒過雖然佢唔使好似你咁日理萬機但要做晒屋企嘢都會攰，係呀會病會想偷懶會放空會做錯嘢，你唔會咩？
正常人唔會無端端想搵個唔識又唔同文化嘅人返嚟同自己長住，真係嫌屋企太大無人氣咩。請得都因為有需要，而你請個人返嚟幫手，佢就係你助手唔係你對手，你係要佢幫你解決你需要解決嘅問題，唔係不停搵佢嘅問題，最後成為一個自己永遠解決唔到嘅問題。