黃大仙天馬苑商場自從去年被領展放售之後，接手的新業主，拒絕與部分街坊小店續租店舖，其中受街坊歡迎、由日籍麵包師傅久下先生經營的優質麵包店，都無得留低，昨日結業。街坊都好唔捨得，於是由居民自發組織的「救救天馬苑大聯盟」，喺麵包店門前舉行商戶告別派對，Ray喺現場都好感動，有街坊自攜樂器嚟現場大合奏，借《獅子山下》一曲改成《山下天馬》，向將要離開的商戶致意，大家都依依不捨，連久下先生都不禁落淚。
久下先生呢間麵包店已經營咗6年，之前佢原本喺日本著名麵包店DONQ做麵包師，後來獲公司安排來港參與開店，來港後佢仲同當時任職店員的太太結緣。之後久下先生又獲邀過檔到city super製作手工包，可惜後來公司路線有變，令佢決定自立門戶，跟隨自己堅持的想法，嚴謹製作麵包。
後來，佢睇中咗人流唔算多，但較多長者的天馬苑，希望人人都可以食到無添加、無防腐劑、即做即賣的優質麵包，而店名Bread Plus的意思，就係想大家鍾意麵包鍾意到令佢成為主菜。久下太太話，原本諗住喺度退休，點知……不過，因事件被廣泛報道，吸引投資者邀請合作，佢哋決定下月10日喺九龍城開店。
