受本地中式連鎖快餐品牌大家樂重金禮聘來港，被譽為「全球最靚仔數學教授」的Pietro Boselli昨日身穿Sharp醒黃色TEE，真人現身香港機場，一落機已被大批在場守候的粉絲包圍，其中三名女粉絲專程由日本到香港，只為見男神一面。Pietro也表現得極親民，任摟任拍任親臉，簽名及禮物都照單全收。
呢位28歲意大利型仔博士唔單只靚仔，加埋1米85身高、集42吋強勁胸肌、凹凸有致的腹肌與人魚線於一身，2014年於英國著名高級學府倫敦大學學院 (University College London，簡稱UCL) 任機械工程學系數學教授期間，吸引全校學生，學生不捨得走堂，締造100%出席率的佳績。其實Pietro年僅6歲就被意大利國寶級時裝設計師Giorgio Armani睇中，拍攝品牌童裝Armani Junior廣告。求學時期發奮向上，2010年以第一榮譽學士畢業UCL機械工程學系，隨即修讀博士，並在母校UCL教數學至2014年，期間被學生發現兼任模特兒，令人氣直線上升，Instagram粉絲人數更直逼200萬。
佢今次重點活動係於5月10日(星期三)出席以全新面貌示人的大家樂星光行店揭幕禮，因為大家樂呢次係同意大利咖啡品牌Segafredo合作，開設全新概念店，搵意大利型男東來就合晒邏輯，佢仲好識做，表示對這次香港之旅非常興奮，期待品嚐中餐，尤其是中式快餐文化，最想食焗豬扒飯，據講佢到時會谷行老鼠仔拉着仿照意大利傳統交通工具貢多拉而製作的車子，載着「十優港姐」麥明詩 (Louisa) 出場。粉絲又有排忙啦！
