其實呢，當你睇咁多媒體消息，大部分都係選舉的消息。侵侵依家陷入了烏克蘭門。因為佢為了要打敗潛在對手民主黨嘅拜登，於是就夾烏克蘭去調查拜登個仔響烏克蘭有冇做壞事。於是，為了達到目的，侵侵就用盡政治力量去做，包括夾烏克蘭總統去做啦，如果做就有賞，如果唔做有懲罰呀之類。
依家呢，一切唔同晒啦。因為單嘢黃咗，國會正響度搞緊彈劾聽證會。今次彈劾力度開始時好大，但搞到依家，似乎都冇乜嘢入到位去隊侵侵。咁因為侵侵一路死都唔認，國會點樣做好難動他分毫。既然係咁，倒不如把心一橫，就將最辣手之香港人權與民主法，一次過拿去投票。參議院通過咗一個版本之後，眾議院就立即用呢個版本去投票通過，即係趁侵侵仲響度死捱的時候，走去白宮插多一刀。政治就係咁，一刀一刀咁樣拮入去。侵侵會唔會被打敗？當然唔會啦，你地真係太天真。我唔鍾意侵侵，唔代表唔客觀睇事實。侵侵係好難被打敗嘅政客。為了下年參眾兩院選舉，共和黨最重要嘅變化，就係好多原本同侵侵保持距離嘅議員同埋政客，依家全部埋返去侵侵身邊，核彈都唔割。冇嘢嘅，如果唔係侵侵有贏面，點會有政客埋身呢？
政客往往就係咁樣。當你有贏面，個個都畀面。侵侵贏面大，共和黨響國會都挺佢。台灣English Choi有贏面，好多綠營嘅人，都紛紛歸隊了。點樣去睇贏面呢？上次提過，有幾多人願意同佢影相做選舉廣告，係一個指標。另外就係有幾多人決定加入幫手啦。依家台灣選戰要注意嘅，就係不分區立委之選舉名單。因為響今次台灣嘅選舉，除咗立法委員係直選產生之外，亦都有不分區立委，係用政黨之支持度來排名分配嘅立委名單。一般大黨，只要你響不分區立委名單排第一，基本上贏硬。所以藍營近來最大件事嘅，就係藍營名單，有一堆深藍啦，係未？至於綠營呢？個個都想爭第一名入圍啦。依家不分區第三名嘅，就係一個細黨社民黨嘅一姐范雲。咁樣代表乜嘢？即係細黨之聲音，慢慢被吸納囉。
依家English Choi之聲勢回勇，藍營Korean Fish就因為佢買樓之事，日日俾人挖出來。老實，買樓賣樓炒樓呢，冇人話有問題。只係呢，一旦做政治人物，成日都唔肯將個事實講出來就幾頭痕。藍營嘅立委不分區名單出爐，Korean Fish身邊班深藍韓粉同吳敦義嘅支持者都有份，但係唔係個個有實力嘅都有份囉，例如我偶像謝龍介就唔見咗。唉，一去到利益分餅，響地方有實力有名氣，都唔夠有派系支持嘅政客，咁搞法，Korean Fish選舉凍過水。民調話，藍營選戰，總統、立委同不分區名單全部都失利，咁搞落去，全線告急矣。