馬會斥資38億、歷時11年的中區警署建築群(又稱為大館)活化計劃剛剛完成並向公眾開放，成為一時話題，馬會亦馬上找來前警務處長李明逵，於旗下刊物《駿步人生》中做封面人物，由前一哥推銷大館，非常有橋。
話說李明逵於1974至75年在大館任職刑事偵緝部小隊主管，其辦公室正設於總部大樓二樓。佢記得大館上班首日，要拜會總指揮官，地板打了蠟，每行一步就跣一跣，要好小心，恐防跌倒。當時環境不算理想，「辦公室是板間房，到處漏水，落雨要邊擔遮邊打字。」最特別是辦公室睇到檢閱廣場（當年人稱「大地」），騎樓變成用來「觀察大Sir動靜」的另類哨站。
至於廣場中的芒果樹，阿Sir話有「升職芒果樹」之說，因為警隊每隔一段時間就有人事升遷，估計芒果當造時，剛巧係每年公布升級名單的日子」，這個穿鑿附會的差館傳說，卻成了老警察的集體回憶。大樹好遮蔭，約人「蛇」出去飲杯咖啡，都會在芒果樹下等。
李明逵07年退休後，未聽聞佢到私人機構打工，反而以賽馬會文物保育有限公司諮詢委員會及文物工作小組成員身分，參與馬會的大館活化計劃，閒時亦會義務教導大學生做菜，佢話煮嘢最緊要經濟實惠，健康美味又做法簡單：「比如煙三文魚意粉，加鹽加胡椒加橄欖油，10分鐘搞掂。」果然有一哥本色！