作為一個海膽lover，呢個北海道之旅真係等到我頸都長。放心，我喺最強寒流之前已經返到香港。
有人話，去北海道，冬天係最佳季節。撇除天氣凍日日都包到粽咁，同埋溶雪不斷跣倒之外，冬天嘅北海道真係會令人著迷。細雪紛飛其實真係好靚好浪漫！由於今次行程較短，上唔到利尻島食即捕即開海膽，只係留喺札幌4日，咁就惟有專注搵食啦！
位於函館嘅うにむらかみ(Unimurakami)，係當地非常出名嘅餐廳，專賣海膽丼同各款海膽菜式，更有海膽會席料理。佢哋主張無添加海膽，冇加明礬處理，亦設有工場，以確保品質。幾乎每枱客人都order嘅海膽丼，4,320円，有足80克海膽，鋪滿飯面。由於係無添加，所以味道最真最新鮮，係最天然嘅甜味，質感細膩。甜味喺舌尖慢慢散開，食食下你會唔捨得食晒碗飯！札幌市中心都有分店，貨源相同，如果好似我咁只係留札幌幾日，建議唔使突登過函館食喇，過日本生命札幌ビル都有。
うにむらかみ 北海道札幌市中央区北3条西4丁目日本生命札幌ビルB1F
https://uni-murakami.com