由英國米芝蓮名廚Simon Rogan掌舵嘅餐廳Roganic，早前喺銅鑼灣開業。挾著米芝蓮名廚之名，人均消費當然唔平，所以我選擇咗lunch time去幫襯，每位$280，價錢合理。由前菜到甜品，每一道都好講究，甚至乎連一件牛油，都揀選Hampshire嘅Cultured butter，嚟到香港再用人手逐件捲。牛油質地比較軟滑，淡淡牛油香唔會搶去soda bread嘅風頭。餐廳實踐Farm-to-table嘅概念，因此裝設溫室櫃種菜，務求用最天然新鮮嘅時令食材入饌。
前菜主菜當然合乎水準，但個驚喜位絕對係甜品！麥味香濃嘅黑啤雪糕，加埋牛奶糖紙，入口即溶，一甜一甘。牛奶糖紙輕輕用火槍燒過，變得脆身之餘，更呈微捲，更有造型！
銅鑼灣告士打道255號信和廣場UG樓8號舖│2817 8383