被馬迷暱稱為嘉琦BB的香港唯一女見習騎師蔣嘉琦，昨日在社交平台宣布因傷掛靴，相信會令好多馬迷若有所失。嘉琦BB自己於IG話呢個決定會令許多人感到驚訝，同時也充滿著疑問，都難怪，因為以見習騎師嚟講，佢都算幾威水，現年25歲，已經累積取得58場頭馬，係香港歷來贏得最多頭馬女騎師，更曾於2016年4月10日沙田賽馬日，創下一日四勝佳績，成為香港歷來在一日內贏得最多頭馬的女騎師。又於2016/16年度馬季，憑37場頭馬，獲頒首屆告東尼獎。
蔣嘉琦最近6個月因手指、背部和膝部的傷患休息養傷，期間有時間靜下來認真考慮本身事業發展及未來計劃，同導師和家人商量後，決定基於健康理由，要離開佢十分熱愛的賽馬事業，發展人生新的一頁，不過佢話仍然熱愛賽馬和其他運動，希望能夠在這方面繼續發展，亦不忘感謝馬會、校長陳念慈以及師傅呂健威給予的支持幫助。
留言方面以支持居多，有人話佢差12場頭馬就可成為大師傅，非常可惜，亦有人話馬圈人事複雜，有時身不由己，加上行船跑馬三分險，祝福嘉琦BB另謀出路。