台灣藍營真係響一個困局。呢樣並非單純係Korean Fish的問題。查實Korean Fish已經好努力咁樣四圍拜票，但問題係佢始終係高雄市長，總唔能夠唔響高雄做事。今時唔同往日。以前佢係nobody，仲係俾黨中央迫去高雄，響大家睇淡下贏咗市長大位，去年底到年初，聲勢一時無兩。
高雄市長韓國瑜
但係依家佢係somebody，不過佢同黨內精英嘅關係真係唔好。呢幾日睇電視，佢已經四圍走同不同派系團體食飯，咁好似成個黨，只有佢一個人去選舉咁樣，其他高層人士核心藍營分子，唔係好多出嚟陪佢四圍拜票，lone wolf again。呢兩個星期單人匹馬拜票，係未黨內精英似有意又冇意地對佢cold shoulder呢？睇個形勢，難怪有人懷疑，藍黨中央係咪玩佢？
問題係，依家既然出咗一個參選人，又冇理由唔全力支持到底啦？依家圍繞著Korean Fish嘅新聞，包括佢以前好鬼亂使錢，又或者佢成日出入一些場所打下衛生麻雀，又或者以前佢時常出入一些娛樂場所等等，早幾日俾人爆番晒出嚟。我又唔覺得，選民想選市長，係要選聖人，從政前後一定要完美無瑕。所以Korean Fish之前鍾意嘅花天酒地嘢，唔一定係壞事，而且選完之後，即使有打下牌，係未真係衰到十惡不赦呢？如果選民係藍營，點都覺得Korean Fish都係正常人，打下牌又有乜問題呢？
所以睇政治千萬唔好鎖自己入同溫層，咁樣就會不斷自我催眠，以為自己及朋友所思所想就係真理。最後自我催眠失敗收場，回到現實。我係講緊台灣政黨「時代力量」。時力有一位「戰神」叫Yellow昌，精神領袖也。N年前，筆者都同過Yellow昌及一眾學者開學術研討會。佢當時係台灣中研院學者，仲留住長頭髮，同一班北方學者開會後食飯吹水。咁佢去咗選立委，政治立場就係深綠，仲要係以問政吹水力極高出名，花名係「戰神」。
先係好多人話呢個時力係戰神黨，因為個個只係聽戰神話事。戰神年初唔做主席後，黨內路線分歧越來越嚴重。近幾個月民進黨講明唔會再禮讓其他政黨選立委，總之盡量有幾多個位，就塞爆幾多個候選人，咁就有好大嘅拉力，因為如果時力唔同民進黨協調，隨時就會自己人打自己人，攬炒也。咁Yellow 昌素來都係我行我素，一直都唔賣帳，又唔去處理黨內分歧，於是呢個星期，兩個立委退黨，加埋之前因為助理利益衝突問題被踢出黨嘅另一個立委又走埋，黨主席又辭職，上次選地方議會時又有派系分裂，well，就係咁樣，以一個人為核心嘅黨，分裂又走又分裂。
小黨要生存，好多時要靠魅力型領袖。要壯大，就唔係靠一個人，就係要靠組織，再由組織形成「大台」。咁樣先至有更好嘅作戰力。但係冇大台嘅時力，下屆立委可能泡沫化收工。
倫敦大學亞非研究學院法律系博士