(相片由作者提供)
今年叱咤樂壇頒獎典禮嘅神秘嘉賓成為2018頭炮嘅潮流佳話。如果你out到唔知我講緊乜，我話番你知，今年謝霆鋒放低鑊鏟揸番結他做𠮟咤的開場嘉賓，全場活著viva了。中場亦由殿堂級實力派魅力巨星陳奕迅重溫當年我地仲係青靚白淨，聲都未轉曬那個年代的經典歌曲。大家都瘋狂了，聽番18年前嘅歌先突然覺得自己同流行曲好似仲有D關係。
但係，「多謝 Paco 」呢？ 唔見左嘅？呢句話，你明、我明，但係同好多真正嘅後生仔講，佢會話：「你講乜Q呀？」
當年，Paco 個名不比謝霆鋒、陳奕迅遜色。頒獎禮上，幾乎每隔5分鐘就彈句「多謝paco」出嚟。當然啦，佢親手簽左劉德華、郭富城、許志安、古巨基、陳慧琳、黃傑、楊千嬅等超級紅星。每年頒獎典禮都由佢嘅門生包攬各大小獎項，「多謝 Paco」這句說話亦成為每個得獎者嘅指定動作。但係今日嘅頒獎典禮已經再見唔到「多謝 Paco現象」。
咁點解謝霆鋒、陳奕迅今天咁威威，Paco 卻唔見左？雖然我成日寫埋晒自己D大陸歷奇，但係我唔會一句話講死，因為謝霆鋒陳奕迅肯上大陸，但係Paco 死守香港，就咁寫完篇文章嘅，我地應該更理性咁去分析。
如果大家坐時光機番到15年前，我地會見到謝霆鋒仲係一條乳臭未乾嘅死𡃁仔，仲因為頂包案俾人捉左去坐監；陳奕迅俾媒體話佢太年少得志所以經常語無倫次，神神經經，長輩話佢癲癲瘋瘋，怕教壞細路，然後又狂甩頭髮，又俾人批評把聲唱爆曬，聲帶最多3、5年壽命；咁 Paco 呢？個個多謝前多謝後，好不威風，前呼後擁。
當年呢3隻股放喺你面前，你會投邊隻？兩隻喪股同一隻實力派當紅炸子雞股。唔好計馬後炮嗰D人，個個都會買Paco呢隻股，因為穩陣、識生金蛋。
到左今日，揭盅了，莊家贏曬。因為凡事有cycle, 「多謝paco」已經係15、20年前嘅事。所謂上台總有落台時，人總會老，要退休，個台總要讓畀年輕人。 今時今日，好多人要打到呢樣、平反嗰樣，其實唔駛打呢打路啦，因為總會來的。比如你街坊三姑六婆個老豆包過二奶，你總要懶正義咁公開要重提舊事，要求三姑六婆個老豆公開認錯，咪盞搞囉。等個阿伯歸左西，自然乜都有得平反。
所以，與其花精力去改變一些明知道改變不了的現實，不如看看15年後，是否能在台上佔個好位置。
當年的謝霆鋒同陳奕迅，肯定同其他所有藝人一樣，喺演藝路上給自己定了一個好宏大嘅目標的。亦同樣地，跟所有藝人一樣，演藝路上沒有一帆風順，跌跌撞撞，甚至趴過街。
如果你係一個80後，會明白活到今天剛好係人生路上的困局階段。無論係職業仕途上、家庭上、愛情上，難免不會一帆風順。曾經有位神父同我交談時講過：「Hurt Enough, Need to Change. Learn enough, need to change」
謝霆鋒當年喺受傷處趴番起身，由於香港市場未能容得下佢，所以轉換了環境，在大陸發展。係「Hurt Enough, Need to change」。最後闖出自己的天下。
而陳奕迅當年已經縱橫香港樂壇超過10年，跌跌碰碰，要撞板嘅位都畀佢撞曬，連波子都撞碎埋。要學嘅嘢乜都學曬，所以往大陸、東南亞發展。係「Learn Enough, need to change」。
新嘅一年，當大家睇番兩位哥哥同台在叱咤嘅演出時，可以諗番當年我地畀自己嘅人生目標係乜。如果發現自己喺一個困局裏面而未能繼續前進的話，祝新的一年的起心肝，衝破難關。15年後台上見！