女神同女王有咩分別？
女神收嘅係兵仔，女王收嘅係御林軍。
兵仔嘅作用係行先死先。女神話lunch去飲茶， 兵仔梗係拿拿林行先死去霸位；7仔有得換Hello Kitty，兵仔晨咁早就死去搶先排隊，換完再換，儲夠成set向女神供奉；女神個proposal未做好，又要早返屋企beauty sleep，叫兵仔幫手，呢啲擺明係榮譽啦，梗係通頂都死起佢啦。
做兵仔最大榮譽，係幫女神買M巾，心情就好似有得去新樓盤揀樓咁，幾興奮呀！揀樓同揀M巾一樣，最緊要通爽舒適。望住一pack pack長短護翼防側漏輕柔體貼嘅M巾，係會令一個血氣方剛嘅兵仔有好多幻想，一諗可能有機會同女神上車，興奮嘅感覺由丹田一路谷到上腦，high過打爆機。
兵仔望女神， 有一種過電嘅感覺；望公司嘅女王，就好似俾雷劈。望女王，識望一定要仰望，唔理你實際係咪高過佢。女王一定覺得自己高過你，醒過你，佢明嘅嘢你一定唔明，所以佢成日要問：你明唔明呀？佢預咗你唔明，都問，咪親民囉。
不過女王其實係無當身邊嘅人係蟻民，佢地係奴隸，係一星期7日一日24小時隨時on call，on WhatsApp嘅奴隸。食緊飯接唔到電話係excuse？！含住啖飯唔可以接咩？text你又成分鐘先覆，反應慢，變通能力低又無責任心，唔怪得女王淨係信佢嘅御林軍。
做到御林軍，等於得到女王嘅恩寵。只有御林軍先可以得到女王真誠問候「你個腦無事呀？你而家睇唔到咩？你無食藥呀？」佢就係想你好，先咁關心你。為咗報答女王，御林軍係可以去到好盡。陪女王連續開幾個會，女王要去廁所，御林軍要負責挽手袋同call車，女王去完廁所趕下個meeting，御林軍無論幾急都唔會行開，完全發揮御林軍嘅堅毅同耐力。梗係，你見過英女皇出巡，有中途話要去屙尿嘅御林軍咩？！