由於屋企有3隻宇宙最可愛嘅小寶貝(Instagram：ihavethreemeow)，所以唔少朋友都排隊上嚟我度睇貓貓。雖然我都係賢淑底，但要大宴親朋都有啲難度，最老土係當你顧住煮飯，又會miss咗同朋友相處時間。
比我更賢淑嘅Fanny，早兩年與同屬酒店出身嘅Match一齊搞咗個上門私人廚師配對平台，可以按個人預算同喜好，預約大廚上門幫你煮餐好餸，將「一頭煙」嘅重任交俾佢啦！試咗三次上門私房菜服務，撇除同Fanny朋友底關係，都真係屬真心推介。即使預約同一位大廚，兩次上門都會煮出唔同驚喜。買餸煮飯全部一腳踢，仲要有水準！每位廚師加入Mobichef之前，團隊都一定會親身試菜，同廚師溝通好，點樣設計菜式同定位，甚至過程中有咩要注意，都一一溝通清楚，有晒一定標準。而每上一道菜式，大廚都會講解一下菜式設計靈感同食材配搭，有時係飲食文化，有時family story，總之係有嘢袋落袋。有大廚幫手，自己就可以享受同朋友相處時光，比起喺外面餐廳食飯，賺到嘅除咗係私人空間(話晒自己屋企，戙高腳食飯都無人理你)，更係同大廚chit chat互動，係一個好好嘅體驗。
Chef Angus，曾經喺日本各大城市學習不同文化料理，擅長京料理、割烹料理同傳統和菓子等，更精通法國料理及傳統法式糕點製作。佢嘅出品每件都好似藝術品咁靚咁細膩！
Mobichef│www.mobichef.com