表哥打電話嚟話寶貝開新舖，叫我一定要去撐場。吓，又開舖？佢3年開過4間喇喎?表哥話香港年輕人畢業無機會發展，好似寶貝有埋博士學位，打份工都係兩萬蚊一個月都無，時間又長，不如自己做老闆。
做老闆最緊要識下放工作，搵舖入貨呢D煩瑣嘢，咪交俾專人處理，使咩自己做？唔收錢又仆心仆命行晒18區睇地方，兼上網搵貨，仲幫手in埋啲售貨員嘅，梗係佢老竇老母啦。又係嘅，呢個世界咁多壞人，寶貝成30歲都無咩工作經驗，一定要幫佢，橫掂表哥表嫂都幫慣啦，寶貝由幼稚園到大學啲功課，都係佢地幫手做㗎啦。
寶貝返工第一份Proposal，都係表哥表嫂做嘅。講起呢個Proposal，表哥表嫂就嬲爆，為咗幫寶貝做好呢份Proposal，佢地攞咗兩日假，做晒資訊搜集同打電話俾朋友問市場情況。佢哋要寶貝個上司收到個Proposal嗰陣覺得好震撼。點知寶貝交咗Proposal，佢上司無反應，淨係話唔係要呢啲，咁要邊啲呢？佢唔知點講，因為呢位上司其實都只係做左3年嘢嘅Manager，佢連Objective、Strategy同Tactic都分唔到，表哥表嫂使唔使搞到個Proposal成本電話簿咁厚，淨係市場分析都幾十版，如果上司睇得明頭3頁，又無瞓著，咁一定係神蹟啦。
表哥話呢啲工，唔做好過做。表嫂叫我要支持寶貝創業。我有邊次唔支持，真係支持唔住，佢話開薄餅店，我日日3餐都食薄餅；跟住佢要開咖啡店，我一日飲5杯，飲到手震。之後又開自製香水店……今次一去到寶貝個舖，我就知中伏！寶貝同Friend夾份開「密室逃脫」遊戲室，叫我買套票，話買10送1。吓，同一個密室，來來去去嗰幾個逃脫方法，點玩11次呀？