雖然我已經離開咗傳媒行業，但我都係掟煲唔掟蓋，得閒寫個column keep住同大家見個面。首先要借個位多謝半島精品店公關朋友送來生日蛋糕，係我最愛嘅Le Peninsula！適逢精品店開業90周年，佢哋最近亦為產品換上新包裝，靈感來自半島酒店大堂嘅經典雕塑裝飾。而以門僮為創作藍本嘅經典蛋糕Le Peninsula亦一如以往咁有驚喜！乳酪mousse蛋糕以椰絲棉花糖包圍，夾有西柚蜜餞、茉莉花茶同檸檬madeleine。西柚嘅甘甜平衡咗蛋糕甜，恰到好處。絕對唔係吹水，我一個人食咗半個蛋糕！
至於birthday weekend，我就去咗之前訪問過嘅一間串燒店弄燒，合埋眼唔理價錢咁order都係$600/2人，價錢唔係話好平，但質素絕對對得起個價！每日新鮮劏即燒嘅肥美白鱔、多款用自製醬料醃製嘅串燒、芝士味噌燒茄子，同埋煙燻汁番茄沙律都好高質素！全部都話自家製，擺明出面食唔到！即使價錢企硬都長期full house！抵佢咁好生意！
半島精品店│尖沙咀梳士巴利道22號半島酒店商場7-9號舖
弄燒│深水埗福華街178號