廢城是怎樣形成？廢人當道，廢物滿街，廢話多說，廢事多變…
上星期日，何君堯與一眾惡魔搞大會站台吶喊，公開煽動「殺人」，並強調要「殺無赦」，大家仍記得1986年爾冬陞導演《癲佬正傳》，片中最深印象的角色，必屬由秦沛飾演的精神病患者阿全，他總愛半夜在屋邨梯間目露凶光大叫「有殺無賠」，平日全媽就買生雞俾阿全，讓他在家殺過痛快，如今，這個神憎鬼厭的何君堯，竟說「殺人」跟殺豬殺狗沒差別，誰才是真正的豬狗不如，衣冠禽獸，廢人當道，何君堯竟做埋立法會議員，這個廢城有幾病入膏肓？
有病就要睇醫生是常識吧！不，活在這個廢城，冇病先要睇醫生，因為代表你才是不正常的一個！廢城主催有病是不用休息，藥商力銷食藥冇睡意，大家可以安心保持精神keep住病，有病又如何，只要有精神繼續工作工作再工作，跟這部維生機器賣命做奴隸，有痛必理，傷風是一種幸福，人禍再不是量產，你懂的！
人人都冇時間，唔通人人都想冇時間？廢城一直推崇廢民不要浪費時間，高科技可以幫你慳不少時間，新型號不斷推陳出新，一切都講求快快快，一追再追，永無止境，諷刺是慳了時間，卻又花更多時間上網消耗生命，甚麼都要速食，上YouTube睇5分鐘，一輪咀解畫懶人包，就當自己睇咗一套兩小時電影，自欺欺人到不能，最新有「6秒廣告」玩法，沒錯，那就是為網上而設的快閃廣告，將原版1分鐘內容，再剪成超濃縮「6秒」版本，傻的嗎？如今YouTube經常見到的Pop-up廣告是這樣，《黑鏡》原來真是一套時代紀錄片，絕不為奇。
一個廢城一天廢紙可以有幾盡？大家早前親歷其境，今時今日，局長仲同大家慢慢推廣「環保」教育，真係「環你老味」，就算戈爾都拍埋《絕望真相2》又怎樣，剛在香港上映有多少人理會？記得十年前在JP銅鑼灣睇 《絕望真相》只得十幾人入場，隔鄰2院《穿Prada的惡魔》卻全院滿座，絕望真相沒改錯名，這個廢城只懂美名搞大量「XX一小時」或「無XX日」之類年度例行公事，又倒數又大堆頭大龍鳳，又明星代言人，又印海報印Tee，又大量贊助單位捐款集資……最後又如何？
一年容易又中秋，今個星期五，廢城又有甚麼「無冷氣夜」，不如搵埋Beyond做代言人，到時同大家唱番首《有冷雨夜》呀笨？真係要玩這一曲送給你的話，非泰迪羅賓2007年版本《嘥氣》莫屬，絕望真相是世上有班吸血鬼，早知有免費能源這東西幾十年，仲要一直呃全地球平民百姓幾多血汗金錢才足夠？一年開乜乜物物高峰會做大龍鳳，自以為站在高峰，自以為地球在你手，仲話要搞移民火星計劃，破壞地球生態的原罪者，掉過頭來想做救世者，WTF！World Trade Fxcker！
如此說法，耳熟能詳，這個廢城亦有好多自以為是的高官權貴口出廢言：「如果你唔鍾意香港，請你離開！」到底是甚麼人令這個香城淪落成為廢城，還要如此惡形惡相趕人走，試問，誰是真正的冷血？涼薄？無恥？
打開電視，先後睇到軟硬兩個貸款廣告，阿Jan同你講自己未來自己來，阿葛就清晰話你知，就算做茄喱啡都要靠借度日，理想始終唔可以當飯食，兩兄弟果然軟硬兼施，一唱一和，比安信更有說服力，自己未來自己來，聽落好有遠景，想來就來，時間不等人，對準目標觀眾，電視機前個個都是人生小配角，不過，這個廢城亦有人生金句：「你有理想，唔到你想！」自己借錢自己還，還得到先好借，這個人人都知，使你出聲忠告，廢府廢言，活在當下，有頭髮先要做和尚！
一個只剩表面風光的沒靈魂廢城，連Ghost in the Shell也不是。