出Trip要早機去晚機返，其實唔算難頂，只不過前一晚OT到3點，返屋企要落妝、洗頭同沖涼，再化妝、執行李同去機場。就算無得瞓，我都頂得住，但如果要同我個心急老細搭同一班機，就真係想撞牆。
同心急老細出Trip，佢次次都約我早成3個鐘，喺機場check in同食早餐。佢話去機場遠，以防有咩事會誤點，早啲去安全啲。8點半飛，5點半到，真係好誇張，不過我入得佢公司，就應該聽佢支笛。Okay，我咪預早3個鐘頭去機場囉。
4點鐘，佢已經開始發訊息嚟，話佢準備出門口；4點40分，就話到咗機場，問我到未；4點50分就話check in完，去機場茶樓食早餐，問我到未；5點話開茶，問我到咗未；5點10分又話點心到晒，問我到未；5點15分我到左去茶樓搵佢，佢第一句就話：「點解你咁遲先到機場？」喂，其實係你早，唔係我遲。架飛機唔會因你早到，就會早啲起飛。
佢望見我只係得一個手提袋，無行李，就好開心咁話：「你終於開竅喇！」事緣佢出親啲3日2夜Trip，都只係帶一個手提喼。佢次次都同我講，去得嗰幾日，使咩帶咁多嘢，排隊等攞行李起碼嘥成粒鐘。係，對一個「佬」嚟講，係完全無問題，酒店都有晒鬚刨、毛巾、牙刷，而且好似心急老細極麻甩嘅「佬」，當然唔會帶緊膚水、化妝水、精華素、眼霜、保濕，防曬呢啲出門基本急救工具，佢點會明我搭飛機時，有幾想敷番個Mask！佢更加唔會明白點解要帶兩對鞋、5套衫，仲要耳環、手飾，皮帶統統襯晒。
心急老細話佢一件Tee，加多一條褲就搞掂，唔使搞咁多花臣。我聽講男人可以將一條乾淨嘅底褲變成3條，首先正常著，跟住反轉著，跟住再反番轉著。心急老細就話，自己好注重衛生，只係著紙底褲，衛生又方便。我就同佢講，我已經考慮連面衫都買紙嘅。