奧客，這一詞流行於中台兩地，意指麻煩的客戶。做得freelancer，袋裡總有一兩個奧客，這些奧客總會令人又愛又恨，我跟飛女都會不時約一些同業出來飯聚，順手開一個「奧客聲討大會」。
A：「我有個真係好衰，成日都輕輕鬆鬆鄧梓峰，鬼死咁鍾意同我哋講笑，講完就自己大笑一輪，咁好啦他咁鍾意輕鬆氣氛，我哋都投其所好，偶然同佢講一個笑……點知畀佢話返轉頭：『我個人其實好嚴謹喎！』好嘞，咁咪唔講笑同佢正經討論啦，佢又問返我：『你使唔使咁serious呀，relax！』真係唔夠佢玩。」
B：「我嗰個都不遑多讓，明明同佢sell條橋係童話故事feel，做晒出嚟佢忽然又對住我講：『你明唔明你可以大膽啲加啲gimmck落去喎，好似星球大戰加正義聯合呀，think out of the box！』同佢討論先知原來佢見到市場上嘅競爭對手用銀彈攻勢買咗啲著名icon作代言……唉，佢咁孤寒邊會捨得咁？咪捽我諗住我可以搞啲勁橋落去囉；好嘞，到我真係扭好咗條橋放入去個job入面，佢竟然同我話：『喂，乜你咁認真？嗰日我吹下水咋喎！』乜你呀，我趕咗3個通宵呀！」
C：「我嗰個又係咁，因為佢拖我錢遲找數，我都好忍讓佢，佢有乜可以幫到手嘅我都做；好嘞，到我等錢交稅、交開銷，搵佢，冇影……收到消息佢有錢，再搵佢追數，總算搵到佢，佢劈頭第一句就講笑話：『使唔使咁緊張呀？你都大把job做，收少我一份都唔會餓死啦！』我真係忍唔住嘩一聲喊出嚟，同佢講：『你可唔可以唔好講啲咁嘅笑，我都好大壓力呀！』條友先識收聲唔再講笑。」唉，原本我倆想向ABC吐苦水，不過似乎他們的苦水更厲害，唯有只聽不語好了。