恭喜快樂
阿叔又有發現。那天跟拍檔在公司派利是，跟拍檔又胡扯了一頓。「你有冇發現而家啲後生係唔講『恭喜發財』？」我愕然了一下說：「好似係喎……不過我都唔講嘅，哈哈。」原來我仲後生。
何解不講恭喜發財？因為現在是「不發財時代」啊。比我們年長的世代，或者物質生活比現在貧乏，而且經濟又在起飛，所以人人都有個發財心(不知為何，我覺得發財沒有發達那麼高Level，發財就是有點富裕)。常言道，七八九十年代，只要你有點能力，又或者夠勤力，你都可以買樓致富。我這40歲大叔，出來工作時2000年代中，出來不久就金融風暴，發財不易，但要餓死又好難。
比我和拍檔年輕的，出來社會工作幾年十年的，生活只會更加富足。他們生活已經滿足了基本，一年飛幾次旅行，日日IG打卡享受人生，世界觀更大，不求發財，追求的是心靈滿足。你跟他們說「恭喜發財」他們覺得你好老套，又反過來，他同樣不主動祝賀你「發財」，他們會講「身體健康」「心想事成」，因為身體比財富要緊，而「心想」可以和金錢無關，你「心想」世界和平，世界就和平了，可以很高尚。發咩財？發咩達？阿叔你行開啲啦。
「喂但係『恭喜發財』其實只係一句Hello，純粹係傳統上嘅開場白，入屋前嘅『你好嗎？』氣氛嘢嚟㗎咋喎。」拍檔話。其實我同意，你真係要現代的文青後生講，相信他們也不會拒絕，你跟他們講「恭喜發財」有時候都會跟口講句回應，只是他們本能地不會主動講，他們不是刻意想你窮的(雖然他們更想你健康)。「我係鍾意同人講『新年快樂』嘅，我就覺得『快樂』大過一切。」我這樣跟我拍檔說，然後他回應：「你呢啲人就係最乞人憎，新年流流祝人『快落』，好多人聽到嬲。」原來祝福語都咁有學問，而我就一直講的都是別人眼中祝FU。Opps。