營業部舊同事「精算娘娘」專登返嚟派帖，佢話幫老公派。其他同事立即搭嘴：「我哋唔識你老公喎，同你都少接觸啦，唔派帖我都唔記得你喺度做過。你真係客氣，請我哋去觀禮。」最後兩隻字係大聲到好似集會叫抗議口號咁。
其他同事其實點會唔記得「精算娘娘」？「精算娘娘」恨嫁個有錢人就全行都知，佢最初考慮轉嚟我哋公司都係呢個目的。其實老細offer俾娘娘嘅人工同職位，根本同佢舊公司差唔多，之但係我哋公司筍盤多，以前又有唔少同事成功將「大男籌」私有化嘅紀錄，所以佢咪過檔囉。
「精算娘娘」返工第一日就周圍問：「你識唔識啲未婚、有樓、有車又有外國國籍嘅男人呀，我想幫個客做focus group，有冇介紹？」佢負責個客係賣廁紙，唔通佢哋想出一隻廁紙專target有車、有樓、有外國國籍嘅男人？估唔到呢啲咁嘅屎橋，真係幫佢搵到個target。
算到盡，先賺到盡。「精算娘娘」除咗代表男家派帖，慳返餅卡之外，佢仲算埋點可以幫到啲太天真太傻嘅人。為免呢種人會以為觀禮係唔使做人情，佢好貼心喺張帖印咗個QR code，一掃就見到娘娘心儀嘅禮物，全部都係超級名牌。吓，多士爐都成幾千蚊個？咦，波鞋都有，萬幾蚊一對，仲有幾萬蚊個手袋！「精算娘娘」揀呢啲結婚禮物，睇怕已經計定第日可以拎去二手網賣啦！
唔少同事都話佢哋唔會做人情，亦唔去觀禮，有去嘅同事返嚟就嬲爆話，扮晒靚做晒人情，竟然企足成兩粒鐘，仲要無嘢食。做茄喱啡都有霞姨派個飯盒吖，「精算娘娘」俾你同佢影張相咋。