公司廁所一向都係最猛嘅地方，隨時撞到污糟嘢，我時運低，一日撞幾次。我同自己講，我睇唔到、我睇唔到，但就次次都睇到，搞到每次入廁所都提心吊膽，唔知幾時撞到正！
撞到正個案一，平時成個文青咁，又斯文又環保嘅同事，成日提住大家廢紙可以再用做影印，又話買洗頭水護髮素要買refill裝，咪嘥多個膠樽。但一入到廁所，就即刻俾大嘥鬼同自私鬼孖咇上身，喺廁格狂掹廁紙墊廁板，墊完廁板啲廁紙，唔係揼去垃圾桶，係揼落地。成半卷廁紙hea到一地都係。我問：「用咁多廁紙，依家製作廁板木乃伊呀？點解啲廁紙唔掉入垃圾桶？」佢話：「唔係呀？啲紙咁污糟，我點執呀？梗係清潔阿姐做啦，做人衛生啲好。」
咁仲未算鬼整，佢洗手嗰陣，用隻捽晒梘液嘅手撳水頭龍，撳到成個水頭龍都黐住啲泡，咁我點撳呀？唔係要我循環再用佢啲泡呀？好喇，到攞抹手紙，平時佢用私伙紙巾就一張撕開3張用，喺廁所上咗身之後，佢攞公家抹手紙，就一次掹3張。乜佢俾水鬼上埋身，隻手抹極都抹唔乾呀？
撞到正個案二，平時每個鐘補一次妝、個樣靚絕嘅同事，最恐怖係佢成日開大唔沖廁，完事唔洗手，然後去茶水間斟咖啡，好carefree咁用手攞方糖，之後懶friend咁走埋嚟攞我枱面包餅食，食到我成枱同地下都係餅碎，跟住仲捉住我隻手一路咁搖，佢條腰又一路扭話：「Mean姐，你啲餅真係好好食呀。」
撞到呢隻污糟嘢，本來係應該即刻夾佢中指，趕佢走，但佢隻手，點敢掂呀！你咪以為我無符，我即刻攞張濕紙巾出嚟黐落佢額頭。哼，怕你呀？我成櫃桶都係「濕紙巾符」！