現在每天新聞報道，主要只有兩款，疫情新聞和法庭新聞，情況持續一年，奄悶得令人寧願熄電視睡覺也不要看新聞頻道。當我等港豬不看新聞幾近成為習慣，從事「碳管理顧問」的朋友Michael提醒說，最近一個星期不得不留意新聞，這邊廂英國召開的COP26(聯合國氣候變化綱要公約第26次締約方會議)，算是有幾項進展，包括各國承諾在2030年前停止砍伐森林、百多個國家加入《全球甲烷承諾》，計劃到2030年時比2020年的溫室氣體甲烷排放減少三成等。另一邊廂，香港政府宣布證監會與港交所正研究在香港發展碳交易中心，他形容，減碳突然成為全球焦點議題，適逢香港政府又有些動作，業界近日忙個不停。
介紹返，Michael的顧問生意，是為企業做減碳建議方案，「近幾年生意本身已經做到無停手，行業互相搶人，請人困難，今次如果香港真係做到碳排放交易中心，就有機會買到樓……」
我搶白說：「幾年前你入呢行，唔係為咗要拯救地球㗎咩？幾時變得咁低層次？」
「我從來無放棄過拯救地球喎，拯救地球的同時都要食飯吖。」Michael忽然曉以大義：「要香港政府做事，都係要逼佢做先得，否則好難成事。環保就係好例子，如果唔係北京、上海已經做咗碳排放交易平台，香港會推得咁急？其實最應該積極推動減碳的部門，唔係環境局咩？但係你睇睇上個月的《施政報告》講綠色運輸，只講私家車轉電動，污染排放最多的商用車有乜政策？完全無提。時間表、路線圖？有一句，就係2025年再諗諗。虧佢好意思讀出嚟。」
我不解：「點解綠色運輸會有人反對？」
Michael解釋：「周街搵食車，要佢地轉用電動，必先要有足夠的充電設施，要有充電設施，就要電力公司加大發電能力、鋪好電網，而電力公司有利潤保證，加強發電、配電基建，即係最終要加電費，你話政府會唔會認真做吖？政府一直只做試驗計劃，有原因嘅。」