瀛仔又扮吓嘢講政治先。好人好事、壞人痴漢、政治時事，總之有關日本事與物，瀛仔都好有興趣睇。朝鮮半島局勢緊張，北韓金仔(金正恩)久不久又射幾支飛彈，有成功有失敗，但不論成敗，南韓已經驚到震晒，日本都驚驚哋，所以金仔射一支，兩國就強烈譴責一次，射10支就譴責10次。
瀛仔當然沒有政治知識，我只想到，譴責有甚麼意思，譴責完又唔係送番支飛彈俾金仔。係咪？好喇，日本首相安倍晉三要回復國家「軍事強國」地位，以保護國家為名，兩年前強硬通過「安保法」，即係一旦國家盟友受到攻擊，日本又處於危機狀態，自衛隊就可以出兵幫人幫自己，一字咁淺，即係打仗！
「安保法」在今次的朝鮮半島事件好受用，金仔癲，美國總統特朗普都唔弱，特朗普同我國習總傾偈期間，射支「炸彈之母」落伊斯蘭國(IS)，即是話俾習總聽，你唔擺平金仔，我就自己搞掂金仔，仲話俾金仔知，我唔再忍喇。因為我有錢，打完你累埋南韓，最要負上全責落台，我仍然係一位富豪。我有錢慣，身為頂級強國，點會被你金仔嚇倒？安倍首相仲醒目，立即扯住特朗普條尾，話美國100%支持日本合力打擊北韓，呢番說話明顯表示「美國打北韓要預埋我喎」。其實，日本軍國主義仲係好強，各電視台的節目都經常解構日本軍力如何強大，自衛兵訓練有幾嚴厲等等，又成日話同美國幾好朋友咁。
本性難移，日本侵華的殘暴DNA，至今仍然存在日本人體內，一旦給予日本軍力更大的自由度，絕非好事。美國副總統Mike Pence與南韓副總統都同意部署防禦系統「薩德系統」，抵抗金仔的挑釁行動，安部首相又有甚麼顯示軍力行動？