老闆話要開個中秋趴(party)慰勞吓啲同事，要有主題。大家投票結果係「喪屍趴」。乜喪屍唔係萬聖節專屬咩？一年一個萬聖節都唔夠玩咩？最多咪俾你地郁埋盂蘭節喇，做咩要搞中秋啫？容咩易搞到第日中秋，我要送喪屍月餅同棺材板月餅俾客？我咁諗唔算喪，我啲同事仲喪，佢哋話后羿阿媽陀佢嗰陣俾喪屍咬過，所以佢就擁有異能，可以射低九個太陽。后羿個造型應該係戴住太陽眼鏡，成個blade咁。而佢老婆嫦娥應該都係俾喪屍咬過，先識飛上天。至於千年不死嘅玉兔、牛郎織女，都應該係喪屍啲friend。有可能喎，林肯都可以係殭屍獵人啦！
原來公司真係有好多喪屍fans，一話扮喪屍，會計部即刻like，佢哋最怕要上台表演，扮喪屍可以唔使郁。老闆都like，佢話寧願做一隻有尊嚴嘅喪屍，都唔想剃腳毛谷胸扮女人。佢照鏡見到自己個「女神」造型，都想打巴佢。(雖然老闆扮女人真係好樣衰，但係同事都好鍾意睇。)既然大家咁like扮喪屍，我提議上網團購啲殭屍袍、殭屍牙………未講完，已經有人反白眼，仲反到去後尾枕。一個平時開會例牌放空嘅同事，突然好pro咁話：「喪屍唔係殭屍！」
喂，乜你以為我唔知喪屍唔係殭屍咩？我只係接受唔到殭屍已經升級到2.0，進化做喪屍。我仲停留喺周星馳、龍炳基嘅「黑白殭屍」年代、停留喺林正英「殭屍先生」年代、停留喺中國殭屍著清朝壽衣；西洋殭屍披黑斗篷、低胸長裙嘅華麗造型年代。
以前啲殭屍無咁恐怖，唔會爛面爛衫，唔會一嘢咬爆一個人個頭。老闆話以前啲客一樣無咁恐怖，佢鬧你，你忍住唔還拖，好似遇到殭屍停止呼吸，佢感受唔到你度氣，就會走。而家啲客，一唔高興，喪鬧，喪減budget，就算你忍住道氣，佢都照咬你。
咦，咁不如請埋客參加party，佢哋可以做返自己——喪屍，我哋就扮喪屍獵人。