香港火頭處處，其實係台灣政治新聞嘅重要因素。唔係我亂吹，如果大家打開台灣新聞，一定有香港示威的新聞，而且台灣政治人物仲要點樣回應香港時局。咁突然之間，台灣總統選舉熱門參選人要回應香港新聞，你話係未搞嘢呢？即係我地香港政客忽然之間要日日回應台灣新聞，係未真係考死啲本地政客呢？
原因好簡單，因為依家總統熱門參選人，民進黨之English Choi，幾乎次次香港有示威佢都要出來講嘢，而香港示威之火焰，令台灣部分大學有連儂牆被撕啦，有香港留學生俾啲北方大國嘅留學生打啦，跟手又有個反送中大遊行，連台灣本土派所有大佬都出來支持，咁真係English Choi全部贏盡，咁其他台灣政治人物，如果響香港示威嘅議題上唔夠English Choi強硬呢，咁就會畀人砌賣台，咁如果去得比民進黨更強硬呢？咁有機會得罪北方強國啦，可能連累埋身邊所有人搵食，企邊一邊都出事。
所以，香港因素解釋咗點解Korean Fish冇辦法響支持度慢慢下來呢？因為佢無辦法響香港問題上強硬得過English Choi。當然，既然自己係弱勢，佢亦唔會響香港問題上直接同English Choi狂打直線抽擊，避得就避啦，問題係，Korean Fish年頭仲來香港同一姐加埋西環Chi Man會面，台灣人記憶猶新也。香江一姐依家民望跌到谷底，每出來一次都衰一次，西環Chi Man就幾日唔見佢出現，北方京城的國慶晚會之出席名單，又唔見佢個名（我估佢都有出席，只係新華社忙得滯唔記得），Korean Fish一講到香港議題，真係口窒窒。English Choi自不然又繼續支持香港示威者啦。
今個星期留意民進黨嘅副總統參選人啦。外面一直盛傳，English Choi已經同賴神賴清德基本嘢已經傾好咗，即係整合成功，依家靜待時機成熟至會正式公布。至於對手Korean Fish就好似連副總統參選人方面，仲未有人肯同佢一齊上拍住選，真係奇怪。藍營真係內鬥，唔想Korean Fish贏嗎？
鏡頭一轉，又去到印尼嗰度。依家就一樣出現大龍鳳。大家唔使太擔心，印尼會出現暴亂，因為印尼有上街有暴亂，唔係新鮮事。佢地爭取民主化之成功，亦係靠場場街頭運動有關。咁義士響街頭見面完之後，幾個星期後街頭運動成功咗，部分溫和派咪出來收割啦。印尼學生不單係反對惡法嘅，而係仲有反貪腐反官商勾結等訴求，圍住國會唔俾人出入了。不過，佢地學生同市民，睇來唔係好夠裝備，單係用普通口罩，點可以頂到TG放題呢？
至於總統佐科早幾日忽然又話，願意同西巴布亞嘅分離分子會面，咁就真係跌晒眼鏡，因為「西獨」已經毒了幾十年，忽然總統願意傾，似乎佐科係想響政治上有所突破，同時轉移下示威者視線，但印尼會唔會畀西巴布亞獨立？似乎冇人信矣。
倫敦大學亞非研究學院法律系博士