每逢過年，電視都有《家有喜事》。如要數「賭片」，《賭神》之餘仲有《賭俠大戰拉斯維加斯》。所以作為世界最大博彩代表，點可以唔到此一遊。
記得有一年，跟媽媽去探auntie。成年人在打牌，小朋友在「魚蝦蟹」。自己一直在忍手，心知貪字得個貧，賭錢得盆桔。點知啤牌時段輸了兩毫，心有不甘，好幾日唔開心。經歷太在意，自此不賭錢，所以每逢到澳門，都只係吃吃喝喝，不作貪念，可惜都喺股市和樓市幾次都輸到眼凸凸，眼濕濕。
外表風光，內裡優雅
講開澳門，呢個以博彩業為主的Macau，都被稱作亞洲Las Vegas。而真正的City of Las Vegas於1905年開埠，因為淘金熱潮突然大量人口湧入，但於1931年碰著經濟大蕭條，因而州政府通過博彩合法議案，自此成為全球最具代表的賭城，連賭俠阿King同化骨龍，都要大戰生擒Peter朱。
其實拉斯維加斯賭場只係一面，博物館、高爾夫球場、遊樂場、足球場、公園及狗隻公園多不勝數。亦因需要吸引賭博之主業，其他衍生的副業更為吸引。最精彩的表演、最美味的食物、最重要係相對外間高質之餘，價錢更較為便宜的。
初為沙漠，今成澤國
Las Vegas本身為沙漠地區，夏季溫度可達40度，戶外設有噴水降溫設施；相反冬季嘅最低溫度跌到零度，有機會落雪。如上文所講去拉斯維加斯，最吸引其實係睇show同食自助餐，知名巨星演唱同出色嘅團體表演，例如Le Rêve(The Dream)、由Cirque Du Soleil表演的《The Beatles Love》同《Michael Jackson》、成人限定的《Jubilee》及《Fantasy》等等。就算離開酒店賭場的表演舞台，在Las Vegas Boulevard(拉斯維加斯大道)的Las Vegas Strip(賭城大道)之各酒店門口，已經建設了不少世界宏偉建築的「縮水老翻」。將各地著名建築及名勝，放在街道，如自由神像、凱旋門都可以搵到，再唔係可口可樂、M&M’s等大型旗艦店同紀念品，都興奮地甜到入心。加上個別酒店的門外免費表演，如Treasure Island、Mirage、Bellagio的噴水，都叫賭城大道精彩萬分。
先係贏錢，最後乾塘
講到Bellagio酒店，不得不提電影《Ocean’s Eleven》(盜海豪情)。電影細緻地放大了賭徒生活，亦集中描述了賭場特色。呢個原為西班牙語「肥沃的山谷」，由一個沙漠和半沙漠地帶變為現今的繁華。華燈背後，肯定好多人犧牲。輸錢易而贏錢難，講到尾，賭錢可以家散人亡。所以去拉斯維加斯，無謂將人生作為大戰，回頭是岸，有乜好賭吖！