作為一個成年人，喺香港想買酒的話去附近嘅便利店、超市或士多買就得。大支細支，啤酒、葡葡酒、日本清酒，各式各樣嘅酒類都好容易買到。唔少瑞典人嘅日常生活都離不開酒，好多瑞典嘅傳統亦涉及酒，但其實喺瑞典買酒反而比香港更難。
自古瑞典人就同酒有莫大淵源，世世代代亦因為酒而引起唔少社會問題。瑞典政府為咗唔想市民飲酒過量，特別除咗提高酒稅，更加設立咗國營酒鋪Systembolaget，方便規管。所有酒精含量3.5%或以上嘅酒精飲品只能夠喺國營酒舖Systembolaget發售，而酒精含量低於3.5%嘅啤酒，威力冇咁強勁(嗯，3.5%以下嘅酒對瑞典人嚟講確實係小菜一碟)，可以喺超市、士多等等出售。有趣嘅係，瑞典飲酒嘅合法年齡係十八歲，夠秤而又能夠出示證件就可以喺領有酒牌嘅餐廳同酒吧合法飲酒。但講明飲唔晒唔准拎走，如果要入琳瑯滿目嘅國營酒舖Systembolaget買酒，就必須要年滿二十歲。
自問個樣生得唔特別後生，但可能因為自己矮，間唔中去Systembolaget都會被要求出示證件，可見制度都頗為嚴格。
由於國營酒舖Systembolaget星期日同公眾假期均不營業，星期六又收得早，所以逢星期五、六及假期前席都會引來人潮。而且疫情影響之下仍然係人頭湧湧，臨關門前數十分鐘更加排隊排到出門口𠻹，可見瑞典人對酒精嘅熱情。至於我點解會知道店內嘅情況？呢層就請大家唔好再追問了。講起人潮都怕怕，等我都飲返杯定定驚先。
警告：未滿十八歲人士切勿飲酒。成年人開車前亦咪飲啊！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐
ig：sis3ter