又到七月，美好而短暫嘅瑞典盛夏。
每年夏天，瑞典人最常互問嘅一個問題就係：「今年夏天會計劃點過？」瑞典人非常重視夏天，唔少人甚至認為美好嘅夏天並唔應該用嚟浪費喺工作之上。瑞典法例規定，所有全職僱員每年都可以享有五個星期嘅年假。每年六月尾至八月頭同聖誕都係瑞典人放年假嘅高峰期。若僱員要求，僱主必須喺六至八月期間安排僱員放長達連續四星期嘅假。放低工作責任同壓力，享受難得嘅和風光明媚。
作為香港人，喺我嘅認知裡面，假期永遠係商戶生意最好嘅時候。但瑞典就正正相反，每逢六至八月，斯德哥爾摩都必定非常冷清，因為人人唔係出國去旅行就係返鄉下探親。期間唔少餐廳同舖頭直頭喺門口貼出告示宣布休息幾星期，同客人一齊放大假。
今年斯德哥爾摩一反常態地變得熱鬧。因為疫情關係，大部分歐洲國家都唔歡迎瑞典人入境，過境手續同所需文件都變得非常繁複。另外由於七十歲以上長者係染病嘅高危一族，瑞典政府呼籲呢個族群盡量唔好外出，要保持社交距離。返鄉下探親計劃被逼擱置，出國又出不了，惟有留返喺斯德哥爾摩。而家只要天氣好，所有室外餐廳、海邊、草地、森林公園停車場都會爆滿。雖然感染數字不斷上升，瑞典人仍然自得其樂，彷彿世界上並冇事能夠阻到佢哋享受假期。
外界唔少聲音都認為瑞典人佛系抗疫太鬆懈，不過每個地方嘅標準都唔同，所以我都不作評論。祝福每一位。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter