有日同老公行超市買餸，佢無端端執起袋大餅話想買嚟做早餐，問起點解先知原來有段古。
故事背景係1897年嘅瑞典，當時有個叫Johan嘅後生仔，為咗想體驗下簡約嘅北部生活，隻身由瑞典第二大城市哥德堡(Göteborg)去到一個位於瑞典北部嘅小市鎮艾爾夫斯賓市(Älvsbyn)。本身Johan只係諗住短期住下，點知好快就遇上咗一位名叫Hilda嘅女子。二人迅速墮入愛河，仲去到談婚論嫁嘅階段。為咗想留低同Hilda雙宿雙棲，Johan開始學整麵包，後來佢哋喺小市鎮Älvsbyn開咗間麵包舖，其中一款古早味大餅非常受歡迎。大餅嘅配方一代一代咁流傳落去，經過無數轉折，Johan同Hilda嘅孫於1972年成立咗Polarbröd，專賣呢款古早味大餅。而Polarbröd愈做愈大，至今仲成為咗瑞典第三大麵包生產商㖭。
大餅嘅成份並唔複雜，主要係黑麥、水、酵母同鹽。咬落鬆化得嚟少少煙韌，甜甜地咁，配火腿或者煙三文魚都好夾。
好可惜位於艾爾夫斯賓市嘅麵包廠最近發生咗場非常嚴重嘅火警，工廠內外所有設施都燒晒，化為灰燼。不幸中之大幸，無何任人命傷亡。但工廠250名員工就於一夜之間變成失業，可想而知有幾多家庭受到影響。Polarbröd喺瑞典南部有另一間規模較小嘅工廠，自事故以嚟日以繼夜趕工，希望能夠盡量趕上生產進度。
冇諗過原來呢袋大餅背後有個咁浪漫嘅故事，我哋打算略盡綿力支持，以後會Keep住買、多啲幫襯。希望大工廠能夠盡快重開，請返晒所有員工，亦好讓呢個愛情故事能夠有個大團圓結局。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter